الرئيسية / اسرار الرحالة / ازاي تطلع شغل كويس وانت مسافر أمريكا سياحه

ازاي تطلع شغل كويس وانت مسافر أمريكا سياحه

اغلب الناس ال بيكونوا عايزين يجيبوا مصاريفهم وهما سياحه بيروح يشتغل عند واحد عربي يذل فيه ويعامله زي العبد عشان شويه ملاليم .. فكك بقي من الشغل اللوكال دة بقي وتعالي اقولك الشغل التقيل
ملحوظه قسما بالله العلي العظيم ما حد هيقولك الحاجات دي غيري .. مش غرور .. لكن عشان اما ميعرفهاش أو عارفها ومش هيقولهالك عشان متقسمش معاه التورته .. انا بقي مش فارق معايا اي حاجه فهقولك كل حاجه بالتفصيل الممل
1- فيه موقع اسمه Freecycle .org
وهو عباره عن ناس من امريكا بتتبرع مجانا بحاجات كثير جدا يمتلكوها لناس تانيه عايزة الحاجات دي
و90% من الحاجات دي بتكون حالتها ممتازة جدا .. كل ال هتعمله انك لما تلاقي حاجه مناسبه تكلم صاحبها سواء فون أو نت و تروح عندة وتأخد الحاجات اللي انت محتاجها مجانا
و بعدين اعرضهم للبيع بسعر رخيص علي مواقع اونلاين كثيرة زي ال eBay و ال Offer Up وال 5Miles وال LETGO وكمان ال Facebook Marketplace
فلما الحاجات دي بتتباع انت هتكسب فلوس من الهوا حرفيا لأنك جايب الحاجات دي مجانا اصلا
ملحوظه مهمه : بلاش موقع ال Craigslist لأنه خطر جدا جدا جدا واغلب ال عليه حراميه عايزين يقلبوك في الحاجه بتاعتك اساسا
.
2- في حاجه ف امريكا اسمها يوم ال Garage sale
( ال Garage sale زي سوق الجمعه عندنا كدة لكن بتتم قصاد البيوت )
هتلاقي هناك حاجات شبه الجديدة بالظبط لم يتم استخدامها تقريبا .. وكانوا بيبيعوها برخص التراب
وطبعا كنت باخد الحاجات دي بفلوس قليله جدا وابيعها اونلاين برضو
(تجربه شخصيه ) خدت من اسره يمنيه عايشه في لوس انجلوس تليفزيون سامسونج سعره ( وهو مُستعمل ) ميقلش عن 670 دولار .. خدته منهم ب 20 دولار في يوم ال Garage sale وبعته اونلاين ب 95 دولار
3- فيه محلات من نوعيه Savers thrift store واشهرهم هي Value village ودي عباره عن محلات بتقبل تبرعات من المقيمين سواء اجهزة او الكترونيات او هدوم او اي حاجه .. عشان المقيمين ياخدوا فاتورة تفيدهم بعد كدة ف تخفيف الضرائب عنهم .. انت بقي تروح قسم المُستعمل عشان تشتري الحاجات اللي المقيميين بيتبرعوا بيها .. بيبيعوها برخص التراب.. ممكن تلاقي شوز نايكي أو اديداس كأنه جديد ومتلبسش غير مرة ولا مرتين ب 3 دولار مثلا !! وهوووب بيعهم اونلاين بسعر اعلي شويه واكسب الفرق برضو
ومش Value village بس ال تقدر تعمل فيه كدة .. دة فيه كمان :
Pawn brokers, Salvation Army , Good will
4- فيه اسواق مفتوحه في امريكا اسمها flea market بيتباع فيها جديد ومستعمل من كل حاجه تتخيلها
اتفق مع مجموعه وأجروا مكان في ال flea market او في نوع تاني اسمه swap meet وبيع فيه مستعمل من اي حاجه انت عايزها .. ثمن التأجير مع ثمن عربيه الشحن لما بيتقسم عليكم هيبقي رخيص جدا لكل واحد فيكم ولكن المكسب لكل واحد هيبقي الضعف
و ساعات بعض المدارس كان بيبقي فيها swap meet مرة في الشهر روح و أجر سبوت وبيع فيه اللي انت عايزة لحسابك
خلي بالك كويس : اولا لازم اللغه بتاعتك تكون قويه جدا عشان تعرف تتعامل وتندمج وتكون صداقات ومصالح
ثانيا لازم يكون عندك خبره في البيع الأونلاين و بروفايلك يكون فيه بوزيتيف فيد باك من عمليات سابقه عشان الناس تثق فيك ويشتروا منك
.
اخيرا الحاجات دي مش هتخليك مليونير يعني!!! دي شويه فتافيت اصلا .. بس انت أولي بأي فلوس تطلعلك .. اهي الفتافيت دي تسددلك ايجار اسبوع سكن .. أو فلوس البنزين مثلا .. كدة يعني

عن karimrok

شاهد أيضاً

الفيزا الشنجن وازاي تسافر اوروبا بسهوله مهما كان وضعك

 الفيزا الشنجن وازاي تسافر اوروبا بسهوله مهما كان وضعك  يعني ايه فيزا شنجن ؟؟الفيزا الشنجن …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *