الرئيسية / اسرار الرحالة / الفيزا الشنجن وازاي تسافر اوروبا بسهوله مهما كان وضعك

الفيزا الشنجن وازاي تسافر اوروبا بسهوله مهما كان وضعك

 الفيزا الشنجن وازاي تسافر اوروبا بسهوله مهما كان وضعك 


يعني ايه فيزا شنجن ؟؟
الفيزا الشنجن دي عباره عن فيزا مُجمعه ل 26 دوله من اوروبا .. بمجرد ما بتاخدها من اي بلد من ال 26 تقدر تدخل باقي ال 25 بلد الباقيين بدون اختام او تأشيرات تانيه .. تأشيرة كومبو يعني .. 
.
زي عروض الشامبو .. اشتري واحدة وخد عليها 25 هديه .. هنا برضو خد تأشيرة واحدة شنجن وهيبقي عليها عرض 25 بلد هديه كمان 
.
ايه هما البلاد ال 26 دول ؟؟
إسبانيا، البرتغال، فرنسا، إيطاليا، ألمانيا، النمسا، سويسرا، إيسلندا ، الدانمارك، لوكسمبورغ، هولندا، بلجيكا، مالطا وليختنشتاين و استونيا، ولاتفيا، وليتوانيا وجمهورية التشيك، والمجر ، وبولندا وسلوفاكيا، وسلوفينيا , اليونان , السويد و فلنندا والنرويج .. 
.
طيب ايه الورق المطلوب عشان اعرف اجيب الفيزا الحلوة دي ؟؟ 
.
في ورق عام بيتكرر في اي سفاره و ورق بتتميز بيه سفاره عن التانيه .. هكلمكم عن الورق العام اللي اي سفاره بتطلبه وبعدين هكلمكم عن الاختلافات في بعض السفارات او هسميها الطلبات الخاصه لبعض السفارات
.
الورق العام للشنجن هما 8 حاجات :
– كشف حساب بنكي 
– اتش ار ليتر من شغلك لو بتشتغل او شهادة قيد من جامعتك لو لسه بتدرس 
– حجز فندق 
– حجز طيران 
– تأمين طبي للسفر من اي شركه تأمين 
– باسبور ساري و صورة منه + صور شخصيه 
– شهادة التحركات 
– تعبئه ابلكيشن بتاع السفر بتاع السفاره اللي هتقدم عليها 
.————————————————————–
نمسك حاجه حاجه بقي ونتكلم عنها بالتفصيل : 
.
1- كشف الحساب البنكي : كل السفارات في الشنجن بتطلب كشف حساب بنكي لاخر 6 شهور باستثناء فرنسا و هولندا وبلجيكا بيطلبوه لاخر 3 شهور فقط 
.
* اهم حاجه بالنسبه للحساب البنكي هو عمليات السحب والايداع .. لانهم لو عايزين يعرفوا رقم نهائي وخلاص كانوا طلبوا منك الرقم النهائي وبس لكن هما بيطلبوا منك كشف حساب لاخر 6 شهور عشان يعرفوا منه طريقه صرفك وطريقه حياتك وهل انت مستقر في بلدك ولا عايز تكت وتهرب ومترجعش 
.
* لو مش معاك حساب بنكي ممكن تاخد كشف حساب والدك او والدتك او اخواتك مع تعهد منهم بتحمل مصاريفك اثناء رحلتك .. 
حساب الاخوات بينفع عادي جدا بشرط ان اخوكي او اختك يكونوا اكبر منك ..
.
* الناس اللي هتسأل هو الرصيد المفروض يكون كام .. معظم السفارات بتفترض وجود 50 يورو في حسابك عن كل يوم هتقضيه هناك في بلادهم .. يعني لو هتسافر مثلا اسبوع يبقي تضرب 50 يورو في اسبوع وتشوف هيطلعلك كام في الاخر ويكون رصيدك في البنك ميقلش عن الرقم ده ابدا ..
لكن عشان اكون صريح معاك .. دة كلام نظري .. بعد التعويم و غرق الجنيه .. لو رصيدك اقل من 2000 يورو في اي سفاره شنجن فرصتك هتبقي ضعيفه اوي .. 
.
* كشف حساب البريد اللي هو البوسطه مقبول بيه في السفاره عادي جدا .. لكن المهم انه ميكونش حساب راكد لازم يكون عليه حركه سحب وايداع مستمره 
.
* الودائع او الشيكات البنكيه او السندات مفيده طبعا ولكن ولكن ولكن مش بتغني عن الحساب البنكي ولازم الحساب البنكي يكون موجود سواء حساب جاري او توفير ..
.
* كشف الحساب اهم ورقه في اوراق الشنجن لو متظبط كويس وعليه عمليات سحب وايداع كتيره اوي ومشتريات بالفيزا و رصيد نهائي معقول وقتها نسبه قبولك بتزيد 
.——————————————————-
2- الاتش ار ليتر من شغلك
* هتجيب اتش ار ليتر من شغلك مكتوب فيها انك شغال في المكان الفلاني من سنه كذا .. ومرتبك الشهري او السنوي كذا .. وهتاخد اجازة من يوم كذا ل يوم كذا .. وان الشغل موافقين علي اجازتك .. وانك هترجع تباشر عملك بعد انتهاء اجازتك .. ولو متأمن عليك اكتب رقمك التأميني جوة الاتش ار .. وبعدين ف الاخر هتكتب عنوان الشركه والايميل او رقم التليفون بتاعهم .. وتختمه من الشركه ختم رسمي .. ويكون متوجهه للسفاره اللي عايز تقدم فيها 
.
* لو بتشتغل شغل خاص يبقي هتجيب سجل تجاري وبطاقه ضريبيه وخلي بالك يكون عدي عليهم علي الاقل سنه من تاريخ انشاء الشركه ويكون ليك ملف ضريبي حقيقي مش وهمي ..
.
* لو لسه طالب هتجيب شهادة قيد من شئون الطلبه عندك في الكليه .. 
.
* سفاره ايطاليا هي الوحيده اللي بتطلب برنت تأمينات مختوم من شغلك .. يعني لو مش متأمن عليك في شغلك متفكرش انك تقدم في ايطاليا ابدا لانك هتترفض ..
.
* لو بتشتغل شغل حر .. فريلانسر يعني :
الفريلانس المعتمد والمعروف لدي السفارات هو اللي بتجيله تحويلات وايداعات منتظمه شهريه من المؤسسات والشركات اللي بيتعامل معاها اونلاين ويكون عنده نسبه من الارباح لدي الشركات دي
.
يعني يكون بيتحول في حسابك ايداعات منتظمه شهريه تثبت انك فعلا فريلانس 
.
أو بيتبعتلك تحويلات بنكيه منتظمه بكل المبالغ اللي بتشتغل بيها مع المواقع 
.
أو بيجيلك ارباح من شغلك بايداعات منتظمه برضو او بشيكات مقبوله الدفع .. وقتها انت بتاخد الشيكات دي وبتحطها ف حسابك ودة اثبات تعاقداتك مع الشركات الاونلاين دي 
.
التحويلات علي ويسترن يونيون اذا كانت شهرية ومستمرة ينفع تقدم ايصالات التحويل كدليل علي شغلك بس دة لا يُغني عن الحساب البنكي الجاري او التوفير .. لكن الايصالات دي مهمه جدا جدا عشان اثبات شغلك
.
* لو انت متخرج ولكن مبتشتغلش .. هتكتب في الابلكيشن انك مش بتشتغل ولكن الاعتماد كله ساعتها هيكون علي كشف الحساب البنكي لازم يكون متظبط اوي اوي اوي عشان يوافقوا ان حد مش بيشتغل يسافر اوروبا .. فرصتك اقل بكتير طبعا من اللي بيشتغل لكن مش مستحيله 
.
* لو انت بتاخد معاش يعني لا بتشتغل ولا بتدرس .. بتاخد شهادة من التامينات مع باقى الورق انك على المعاش بدل ال hr .. وبرضو فرصتك اقل بكتير من اللي بيشتغل لكن مش مستحيله
.———————————————–
3- حجز الفندق
* كل السفارات في الشنجن بتطلب حجز مبدئي مش مؤكد من بوكينج باستثناء سفاره اليونان بتطلب حجز مؤكد ومدفوع كمان ويكون من الفندق نفسه .. 
.
* الحجوزات هتعملها من بوكينج وتكون free cancelation يعني الغاء مجاني و اوعي اوعي اوعي اوعي تلغي الحجز قبل ما تستلم الفيزا لانهم بيعملوا تشيك علي الحجوزات في اخر ايام الفحص بتاع الورق بتاعك عشان يتأكدوا ان الحجز موجود 
.
* دة فيديو بيوضح ازاي تعمل حجز مبدئي للفندق من الالف للياء
https://www.youtube.com/watch?v=V4Kq2Y7KTl4
.
* خليك صايع وانت بتحجز الفندق .. بمعني .. ميبقاش رصيدك ف البنك 3000 يورو مثلا وتقوم حاجز فندق في الفورسيزون ب 1000 يورو في الليله .. اختار الفندق اللي يبقي مناسب مع رصيدك اللي في البنك عشان يبقي منطقي انك فعلا رايح رحله ومنظملها ومخططلها مش مجرد حد بيكمل اوراق وخلاص .. 
.
* حجز ال airbnb و الهوستلز مقبول بيه في السفارات عادي جدا لكن اللي مش مقبول في السفارات ابدا هو الكاوتشسيرفنج .. 
.
* لو هتقعد مثلا اسبوع او 10 ايام او اسبوعين في بلد معينه متحجزش كل الحجوزات في فندق واحد او مدينه واحدة .. لان مفيش سائح في العالم بيقعد في مدينه واحدة او في فندق واحد بس طول مده رحلته الطويله .. يعني لو هتروح 10 ايام فرنسا مثلا .. احجز فنادق 3 ايام في باريس و 3 ايام في موناكو و 2 في ليل و 2 في بوردو .. يعني خلي السفاره تحس انك واحد رايح رحله فعلا مش مجرد بيعبي اوراق وخلاص .. 
.
يعني مش تقوم تحجز الاسبوع كله في فندق واحد وفي مدينه واحدة .. مش لوجيك ابدا
.
* بلاش استنصاح واسترخاص وحياه امك يا شيخ .. احجز الفندق بكريديت كارد سليم وفيه رصيد كافي لعدد الايام اللي هتحجزها .. لان الفندق لو شاف ان الكارت مضروب او مفيهوش رصيد كافي هيعملك cancel علي الحجز وبالتالي لما السفاره تدخل تشوف الحجز هتلاقيه متكنسل اصلا فتقوم مدياك الرفض المتين 
.
.—————————————————————-
4- حجز الطيران
حجز طيران مبدئي .. مفيش سفاره شنجن بتطلب حجز طيران مؤكد .. ودة فيديو بيعرفك ازاي تعمل حجز طيران مبدئي بدون ما تدفع اي مليم
https://www.youtube.com/watch?v=lhkTjO4wotc
.——————————————————————————-
5- التأمين الطبي للسفر .. بيتعمل من اي شركه تأمين .. بحوالي 200 جنيه .. زي اليانز او مصر للتأمين أو قناه السويس للتأمين ..
.
اهم حاجه ان الورقه يتكتب فيها ( صوريا فقط ) ان الحد الادنى للتأمين فيها 30 الف يورو وانها صالحه لكل منطقه الشنجن وهتغطي فتره اقامتك بالكامل في منطقه الشنجن
يعني انت مش هتدفع 30 الف يورو ولا حاجه .. دي الورقه بيبقي مكتوب فيها كدة بس صوريا يعني .. 
————————————————————————
6- باسبور ساري و صوره منه ويكون صالح لمدة 6 شهور فاضلين .. والاحسن لو باسبورك قرب ينتهي تجدده قبل ما تقدم علي التأشيره 
.
* لو باسبورك فيه اختام و فيز سابقه يبقي هتصور كل الاختام والفيز دي وترفقها مع الورق 
.
* لو الفيزا الشنجن علي باسبورك ولسه ساريه وباسبورك انتهي .. هتطلع باسبور جديد وهتسافر بالاتنين .. الظابط هيشوف الفيزا علي القديم وهيختم في الجديد 
.
* الصور المطلوبه للشنجن بتبقي صورتين خلفيه بيضاء .. مقاسها بيختلف حسب السفاره .. اغلب السفارات بتطلب ان مقاس الصوره يكون 3.5 في 4.5 .. ودة لينك بيوضح مقاسات الصورة للشنجن ومواصفاتها بالتفصيل الممل
https://www.schengenvisainfo.com/schengen-visa-applicati…/…/
——————————————————————–
7- شهادة التحركات
ودي عباره عن شهادة بتطلع من مجمع التحرير أو من محافظتك .. بتثبت فيها تحركاتك وسفرياتك خارج البلاد خلال اخر 7 سنين 
.
* بتتطلب منك لو اول مرة تقدم علي شنجن .. رسومها 10 جنيه فقط 
.
* فرنسا وهولندا مش بيطلبوها منك ابداااااااااااااااااا يعني وفروا عليك مشوار المجمع 
.
* بتطلع في اسبوع من مجمع التحرير .. وبتطلع في شهر او شهرين لو من الجوازات في محافظتك وتكون متوجهه للسفاره اللي هتقدم فيها .. 
.
* ساعات بيطلع في شهادة التحركات بلاد انت مزورتهاش اصلا او بلاد ترانزيت .. حاول تعدلها من وانت في المجمع واطلع تعديلها
——————————————————————-
8- ملئ الابلكيشن بتاع التقديم علي السفارات
وعندك اتنين اوبشن .. يا تطبعه وتملاه يدوي وتمضي ف الاخر يأما تملاه الكتروني وبعدين تطبعه ..
وهجبلك فيديو عالمي عن ازاي تملي الابلكيشن بتاع الشنجن خطوة بخطوة
https://www.youtube.com/watch?v=4U56iXQlAUM
.
* معظم سفارات الشنجن بطلت تتعامل مع الجمهور فيس تو فيس .. بقوا يتعاملوا معاهم من خلال كوبري .. يعني ايه كوبري ؟؟ يعني مكتب وسيط بتروحله تسلم الاوراق بتاعتك وتدفع رسوم الفيزا وتتبصم وتمشي .. وبعدين المكتب ده هو اللي بيودي الاوراق للسفاره من برا برا عشان السفاره تفحصه .. 
.
ايه اسم الكوبري ده بقي ؟؟ الكوبري من المكاتب 3 انواع .. كوبري Tls وكوبري Vfs وكوبري Bls 
.
– مركز ال TLS Contact مسؤل عن تأشيرات لسفارات : فرنسا – سويسرا – بلجيكا و لوكسمبورج – المانيا – الدانمارك و ايسلندا 
.
عنوانه فى شارع جزيرة العرب فى المهندسين
.
– مركز ال VFS Global مسؤل عن تأشيرات لسفارات : هولندا و النمسا وايطاليا والسويد والمجر واليونان ومالطا والبرتغال وفنلندا وسلوفاكيا وسلوفينيا
عنوانه فى الدقى فى شارع شارل دي جول
.
– مركز BLS مسؤل فقط عن تأشيرات سفاره اسبانيا ..
وعنوانه : جزيره ميت عقبه في العجوزة شارع محمد حسن حلمي .. الجيزة 
.
– باقي السفارات بقي بيتعاملوا مع الجمهور مباشره يعني تروح تقدم في السفاره مباشره زي سفاره لاتفيا – النرويج – التشيك – إستونيا – ليتوانيا – بولندا 
.
– رسوم الفيزا 60 يورو + 500 جنيه بتوع المكتب الكوبري يعني حوالي 1800 جنيه رسوم الفيزا ..
( الرسوم بتدفعهم بالمصري باستثناء سفاره المجر بتطلبهم باليورو مينفعش مصري )
.
– كل الورق المطلوب منك يا تترجمه انجلش يا تترجمه ل لغه البلد اللي انت رايحها باستثناء ايطاليا لازم الورق كله يكون ايطالي .. وهتلاقي علي موقع السفارات المكاتب المعتمدة اللي تترجم منها
——————————————————————–
الاسئله المتكرره اللي اتهرست في كل بوست بس نجاوب عليها تاني :
1- اي اسهل سفاره اخد منها شنجن ؟
مفيش سفاره سهله لو ورقك مخروم بالبلدي
مفيش سفاره سهله لو ورقك مش مظبوط
لكن اسهل سفاره كمتطلبات اوراق هي فرنسا عشان مش بتطلب شهادة تحركات ومش بتطلب برنت تأمينات من شغلك ومش بتطلب كشف حساب لاخر 6 شهور بتطلبه لاخر 3 شهور بس 
.
لو انت اول مرة تقدم شنجن قدم شنجن في السفارات السياحيه زي اسبانيا و فرنسا و ايطاليا وهولندا
وابعد عن البلاد الاسكندنافيه زي السويد والنرويج لان دي بلاد مهجر وشغل ولجوء ..
و ابعد كمان عن البلاد الصغيره جدا زي لاتفيا مثلا لان مش منطقي حد اول مرة يروح اوروبا وهيسيب كل بلاد اوروبا الكبيره ويروح بلاد صغيره ..
.—————————————————————
2- انا اترفضت في الشنجن بيأثر عليا لما اقدم تاني ؟ لا
– انا اترفضت في الشنجن لازم استني 6 شهور عشان اقدم تاني ؟ لا قدم من تاني يوم
– انا اترفضت في الشنجن بيختموا علي الباسبور ؟
* لو مقدم من دول الخليج ايوة بيختموا ع الباسبور
* لو في مصر لا بطلوا يختموا علي الباسبور حاليا
وكدة كدة الرفض بيكون متسجل علي السيستم اصلا 
.
– انا اترفضت في الشنجن لازم اقدم من نفس السفاره اللي اترفضت فيها ؟ لا
– انا اترفضت في الشنجن التظلم اي كلام وتحصيل حاصل ؟ لا ساعات بينفع
– انا باسبوري ابيض مش هتقبل ابدا في الشنجن ؟ لا تتقبل عادي لو ورقك مظبوط
– انا خدت شنجن ومسافرتش بيها هترفض لو قدمت تاني ؟ لا ملهاش علاقه
– انا معايا شنجن ساريه ينفع ادخل بلغاريا البوسنه وبيلاروسيا او صربيا من مصر مباشره ؟؟
لا طبعا .. لازم تدخلهم من بلد شنجن ولازم الشنجن تكون مالتي انتري مش سنجل 
.
– ينفع اخد صلاحيات كبيره للفيزا الشنجن ومالتي انتري من اول أو تاني مره ؟
ينفع بس بشرط انك تركز مع السفارات السياحيه الكبيره في غرب اوروبا زي فرنسا وهولندا لانهم بيدوها مالتي من اول مره .. وبعد كدة بقي تنشن علي سفاره منهم وتفضل تقدم فيها كل مرة كل مره عشان ايديهم فرطه في عدد الايام وكل ما تاخد منهم فيز اكثر كل ما يدوهالك بصلاحيات ومدة اكبر في كل مرة .. 
.
– خطه الرحله مطلوبه مني من ضمن الاوراق ؟
لا مش مطلوبه بس لو عملتها هيبقي احسن عشان هتثبت انك مخطط للرحله كويس وعارف هتزور اماكن ايه يعني بتثبت للسفاره انك واحد رايح سياحه وفاهم .. لكن هي مش مطلوبه نهائي ..
.
– انا رايح فرنسا مثلا لكن ترانزيت ايطاليا كدة انا هختم فين في فرنسا ولا ايطاليا ؟؟
هتختم في اول بلد هتخدلها من الشنجن اللي هي بلد الترانزيت ومش هتختم تاني ابدا في البلد الوجهه النهائيه
.————————————————————————–
3- اقدم في انهي وقت عشان فرصتي تبقي ازيد في السفاره ؟؟ 
.
علي حسب انت وضعك ايه :
* لو طالب / طالبه يبقي من المنطقي انك تقدم في الاجازات سواء في الصيف او الكريسماس .. لكن مينفعش مثلا تقول هسافر اوروبا في شهر 11 مثلا او في شهر 4 .. مش من المنطقي انك تسيب دراستك ومحاضراتك وامتحاناتك وتروح تتفسح في اوروبا يعني ! 
.
* لو شغال و طالع مع الاولاد يبقي برضو الافضل انه يكون في الاجازات لان السفاره هتقول ولادك هيسافروا معاك ازاي وعندهم دراسه وامتحانات ! 
.
* لو شغال وطالع لوحدك يبقي الافضل يكون في الاوف سيزون بعيد عن ضغط السفارات .. 
.
* لو طالع مع المدام شهر عسل يبقي الافضل تشوف فين وقت ال sale وتطلع في الوقت ده .. علي اساس ان المدام هتعمل شوبينج وكدة ودة سبب قوي للزياره ..
———————————————————————
4- انا قرايبي في اوروبا ينفع يبعتولي دعوة ولا هترفض بيها ؟؟ 
.
الدعوة بتقوي موقفك لو ورقك اساسا قوي .. وبتضعف موقفك لو ورقك اساس ضعيف 
.
الدعوة اثبات ان في شخص تاني قادر علي رعايتك والانفاق عليك اثناء سفرك لكن مش اثبات ابدا انك هترجع مصر تاني او لأ .. يعني ايه الكلام دة ؟؟ 
.
يعني السفاره يهمها تشوف كشف حساب بنكي ليك حتي لو معاك دعوة .. عشان تعرف انت عندك حياه مستقره في مصر ولا لأ .. عندك حياه واقعيه ومستقره ولا عايز تهرب 
.
السفاره يهمها تشوف عندك وظيفه كويسه ولا لأ .. حتي لو معاك دعوة .. عشان تعرف انت عندك حياه مستقره في مصر ولا عايز تهرب وتخلع .. 
.
لو الدعوة موجودة مع وجود كشف حساب قوي ليك + وظيفه قويه ليك ساعتها الدعوة هتقوي موقفك
لو الدعوة موجودة لكن بدون كشف حساب قوي ليك + وظيفه قويه ليك ساعتها بتكون اكبر اسباب الرفض
.
وكل دعوة وليها شروط .. صاحب الدعوة بيروح البلديه او مكتب الاجانب في بلده اللي عايش فيها وهو معاه كشف حسابه عن اخر 3 شهور وعقد شغله وعقد بيته .. وبعدين يختم الدعوة ويبعتهالك بالبريد ..
—————————————————————————–
5- انا اخدت فيزا شنجن من المانيا ينفع اروح سويسرا الاول وبعدين اروح المانيا ؟؟
* انا اخدت فيزا شنجن من فرنسا ومش عايز اروحها خالص في رحلتي لاوروبا ينفع ؟؟
* انا خدت فيزا شنجن من هولندا وتذكره هولندا غاليه فشخ ولقيت تذكره لليونان ارخص ينفع اروح اليونان الاول عشان مستخسر التذكره دي تروح عليا ؟؟
.
قانونا قانونا قانونا قانونا قانونا قانونا وعلي الوررررررررررق مفيش ما يمنع ابدا طول ما فيزتك الشنجن من النوعيه C انك تدخل من اي مكان في الشنجن براحتك ان شالله تدخل من لاتفيا حتي 
.
ولكن ولكن ولكن ولكن ولكن ولكن فعليااااااااااااااا العمليه ليها شويه قوانين بتحكمها و حسب موظف الجوازات وحسب السفاره لما ترجع ..
خد عندك يا سيدي الاحتمالات الممكنه :
1- ممكن موظف الجوازات لو شاف معاك حجوزات فنادق للبلد اللي خدت منها الفيزا بمدة اطول من المدة بتاعه الحجوزات للبلد اللي هتروحها الاول يقولك اتفضل يا معلم صيع وهلس ف البلد بتاعتنا براحتك البيت بيتك
.
2- ممكن موظف الجوازات يمنعك من دخول بلده طالما مخدتش التأشيرة منها وكمان ممعاكش اي حجوزات فنادق او طيران تثبت انك هتروح البلد اللي خدت منها التأشيرة بعد ما تعدي من بلده الاول
.
3- ممكن موظف الجوازات يرضي ويقبل انك تدخل من بلد غير من البلد اللي خدت منها التأشيرة حتي لو مش معاك اي حجوزات اصلا لاي بلد ويعزم عليك كمان ب جوب حشيش ويقولك يا صباح اللي بتغني صبح تاتا اتنين في تلاته ..
.
بس اما ترجع بقي يا حبيبي من الرحله العظيمه دي وتحب تقدم علي نفس السفاره تلاقي بدل ما تاخدها مالتي في المرة التانيه ومدة صلاحيه اطول تلاقي نفسك خدتها سنجل وبمدة اقصر من الاول 
.
أو تلاقي نفسك بدل ما كنت مقدم في المرة الاولانيه بكشف حساب بنكي مخرم وعدت وربنا سترها معاك تلاقيهم رخموا معاك في تاني مرة علي كل سحتوت مكتوب في الحساب وعلي كل مستند بتقدمه
والبس بقي يا معلم 
.
الحل بسيط جدا .. حاجه من اتنين :
1- تخلي معاك حجوزات مؤكدة للبلد اللي خدت منها التأشيرة و تذكره باص او قطر من والي البلد اللي خدت منها التأشيرة والبلد اللي هتدخل منها الاول ..
ويا سلام لو معاك ترافل بلان للبلد اللي خدت منها التأشيرة وتوريها للظابط في البلد اللي هتدخل منها الاول
وكمان زيادة ف التأكيد لو هتعمل شوبينج خلي معاك فواتير محلات او مشتريات من البلد اللي خدت منها التأشيرة عشان تقدمها للسفاره لما ترجع المرة الجايه
.
2- تسافر علي طيران ترانزيت غير تابع لأي دوله من دول الشنجن زي طيران الخليج او الطيران التركي مثلا
يعني تروح اليونان ترانزيت دبي مثلا ,, ترانيت تركيا ,, الخ الخ الخ وبكدة تختم من الدوله اللي خدت منها التأشيرة
.
في منشور جه من وزاره السياحه مؤخرا انك لازم تدخل من البلد اللي ادتك التاشيرة فده خلي بالك منه وحاول تتواصل معاهم عشان تفهم
—————————————————————————
6- اقدم علي الفيزا قبل معاد سفري بقد ايه ؟؟ والحد الاقصي للتقديم قبل معاد سفري قد ايه ؟؟ 
.
التقديم قبل السفر ب 90 يوم حد أقصى من تاريخ سفريتك اللي هتكتبه ف الابلكيشن .. يعني لو مثلا هتسافر في شهر 6 يبقي الحد الاقصي ليك يكون في شهر 3 .. لكن مينفعش تكون هتسافر في شهر 6 مثلا وتقول انك عايز تقدم من دلوقتي .. مينفعش 
.
اما بقي انسب معاد للتقديم فبيكون قبل سفريتك بشهر كامل .. السفارات عموما بتاخد من 14 ل 21 يوم عمل عشان ترد عليك بالموافقه او الرفض .. يعني شهر هيكون كافي اوي للتقديم عليها قبل معاد سفريتك
—————————————————————————
انا تقريبا مفيش نقطه في حوار الفيزا الشنجن متكلمتش عليها بكل الاحتمالات بتاعتها .. يارب تقروا البوست وتستفيدوا منه .. 
.
اهم حاجه تبطلوا تفخيد عشان انا ملاحظ زياده ف الاحجام الفتره اللي فاتت .. خصوصا الناس اللي في السعوديه انا عارف الكبسه مأثره 

عن karimrok

شاهد أيضاً

انت مش بائس .. انت مش قليل .. انت مش اقل من حد

انت مش بائس .. انت مش قليل .. انت مش اقل من حدناس كثيره من …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *