الرئيسية / اسرار الرحالة / شهر عسل ماليزيا وتايلاند والشرح الكامل بكل التفاصيل كيف سافرت

شهر عسل ماليزيا وتايلاند والشرح الكامل بكل التفاصيل كيف سافرت


بعد ما رجعت ناس كتير سألتني عن التفاصيل فقررت أشاركها هنا علشانهم وعلشان الكل يستفيد لو حد عايز يسافر 
بص يا سيدي وَيَا ستي
اول حاجة انا اعتمدت علي نفسي وعلي بعض الأصدقاء في كل المراحل مكانتش شركة سياحة 
اول مرحلة التخطيط : 
عايز اروح فين هناك بالظبط ؟! 
لما سألت عرفت ان في ماليزيا اهم أماكن هي كوالالامبور “العاصمة” وجزيرة بينانج وجزيرة لنكاوي وبما ان بين ماليزيا وتايلاند ساعة بالطيارة فكان لازم أضيفها للرحلة 
طيب عملت ايه ؟! 


١- عملت حجز طيران دولي من مصر لماليزيا بعد ما حددت عدد الأيام للرحلة وكانت ١٧ يوم حجزت علي الطيران السعودي ذهاب وعودة ليا ولزوجتي كانت تكلفته بالظبط ٣٩٧٠ ريال سعودي تقريبا ١٨٧٠٠ جنيه. 
٢- عملت حجز طيران داخلي من كوالالامبور لبينانج ومن بينانج ل لنكاوي ومن لنكاوي لجزيرة بوكيت في تايلاند .
تقريبا زبَط اني اقعد في كل مكان ٣ ايّام وبوكيت خليتها ٥ ايّام .
وكمان في يومين هرجع أقعدهم في كوالا قبل ما ارجع مصر بمعني 
كوالا لاكبور اول الرحلة ٣ ايّام 
بينانج ٣ ايّام 
لنكاوي ٣ ايّام 
بوكيت ٥ ايّام 
كوالا لامبور اخر الرحلة يومين 
ويوم متقسم نصين في الطيران الدولي 
* سعر الطيران الداخلي مش غالي تقريبا كل رحلة كلفتني ٤٠٠ ريال ليا ولزوجتي حوالي ٢٠٠٠ جنيه مع تعديل وزن الطيران الداخلي علشان يسمح ان يبقي الوزن معايا ٢٠ داخل بطن الطيارة مع الشحن و ٧ علي الطيارة لأن في العادى الطيران الداخلي بيسمح بوزن 7 كيلو بس معاك للتذكة العادية .
* الطيران الداخلي كله بالإضافة لرحلة بوكيت كانت علي الطيران الماليزي ودا تقريبا أحسنهم هناك .
* طيران رحلة بوكيت كان أغلي شوية لانهم بيعماملوه معاملة الطيران الدولي فكان سعر التذكرة 660 ريال ليا ولزوجتي حوالي 3100 جنيه .
كدا لسة الفنادق وهنا جه دور الأصدقائ الأمثل لأن فيهم اللى سافر قبل كدا وفيهم اللى قاعد هناك أصلا مينفعش أنساهم أحمد صبحي ومصطفي محمود 
3- الفنادق :
• حاولت على قد ما أقدر أجمع كل المعلومات عن المزارات في كل مكان هروحه ودا ساعدتني فيه زوجتي ربنا يباركلي فيها علشان وأنا بدور على الفنادق ميبقاش الموضوع بالنسبالي مجرد شكل ورفاهية .. لا كمان يبقي قريب من المزارات علشان ميتعبنيش في بلد غريبة عليا.
• فندق كوالالامبور كان هو هواه مع اختلاف الجناح اللى كنت حاجزه وحاولت اخلي الأخير طبعا أعلى وأحسن فى الإمكانية كان بينه وبين برجين باتروناس حوالي كيلو 400 متر يعني حوالي 10 دقايق مشى .
• فندق بينانج كان في منطقة إسمها باتو فرينجي .
• فندق لنكاوي كان في حتة إسمها سيناري باي جنب سينانج بيتش وقريب جدا من المطار ودا كان مفيد جدا الصراحة .
• فندق بوكيت كان علي شاطئ باتونج.
كدا خلصنا التجهيزات وباقي حوار التأشيرات.
4- ماليزيا مالهاش تأشيرة ولو مسافر شهر عسل الظابط أخرة يقولك ألف مبروك وكان التعامل محترم جداً الصراحة، أما بالنسبة لتايلاند فكان لازم تأشيرة طلعت تأشيرتي بسهولة لأنى بشتغل في السعودية وكانت الإجراءات هناك مش معقدة زي مصر وكلفتها هناك 160 ريال سعودي وتقدر تلاقى متطلباتها علي الموقع الخاص بيهم في الرياض ودا سهلي أطلع تأشيرة زوجتي من مصر بعدها .
طيب إيه المزارات اللى رحتها ؟؟ بص يا سيدي
كوالالامبور:
• ملاهي Sunway Lagoon ودي محتاجة يوم كامل تقريبا علشان تخلصها سعر التذكرة الشاملة VIP 280 رينجت وحاول تاخدها علشان هتسهل عليك كتير لو في زحمة مش هتقف في طوابير الألعاب.
• كهف باتو وبرجين باتروناس وأكواريا جنب البرجين علطول ، كهف باتو مجاني ملوش تذكرة دخول أما البرجين كانت تذكرتهم 80 رنجت الصعود لمحطتين الدور 41 دا الجسر اللي بين البرجين وبعد كدا الدور 86 قمة البرج أما الأكواريا كانت تذكرتها 65 رينجت وحاول متحجزش معاها عرض ال 3D لأنه مالوش لازمة ومش هتسمتع بيه تماماً.
• المنارة وتذكرتها 55 رينجت والسوق الصيني وسنترال ماركت وبوكيت بينتانج أو شارع العرب.
دي كانت مزارات كوالالامبور وإنت لو هتروح ممكن تغير ترتيبهم حسب ما يناسبك.
بينانج:
• شاطئ الجزيرة كان جميل وهادي بصراحة حسيت ان الشط كله بتاعي .. كل مسافة بعيدة والتانية فيه ناس بتأجر جيت سكي سعر النص ساعة 150 رينجت وفيه براشوف وبنانا بس صراحة جربتهم هنا في مصر كتير وكانت تجربة الجيت سكي هناك ممتعة جدا.
• منطقة جورج تاون في وسط الجزيرة ودي كلها مولات وكمان هناك عندهم تاميز سكوير في نفس المنطقة دى.
• حديقة تروبيكال فروت فارم ودي حديقة فواكه فيها من كل خيرات ربنا لو أخدت التذكرة الكبيرة 80 رينجت هتخش أوبن بوفيه فواكه بعد الزيارة تاكل لحد ما يبانلك صاحب.
• حديقة الفراشات هناك برضه مكان تحفة للتصوير تذكرتها 65 رينجت.
دي كانت مزارات بينانج لأن المطر كان بيداهمنا كل فترة.
لنكاوي:
أول ما وصلت كنت متدايق من المطر في بينانج لقيت لنكاوي فيها سيول ” يا سوادك يا قرمط ” ؛ بس الجميل انها مهما مطرت مفيش برك مية ولا اى إعاقة للمشي أو حركة المرور الحمد لله .
• رحت فيها شاطئ سينانج .
• رحلة المانجروف المشهورة اللى فيها أصلا أكتر من مزار ومعاها غدا سعرها 90 رينجت للفرد.
• التلفريك ودي تذكرة ب 55 رينجت ركز بقي علشان هتعمل بيها حاجات كتير:
– ركوب التلفريك نفسه هتنزل في 3 أماكن منهم ال Sky Bridge.
– Sky REX.
– Sky Doom.
– 3D Art Museum .
يعنى المكان اللي فيه التلفريك دا محتاج منك تقريباً يوم كامل يا بطل.
بوكيت:
بالنسبالي كانت بوكيت إستجمام لأن تقريبا مريحناش من ساعة ما سافرنا أو زي ما بنقول مبطلناش تنطيط، كان المكان والحاجة الوحيدة اللى عايز أجربها هناك هي ركوب الأفيال، السعر اللى إنكتب في أكتر من مكان علي النت كان 1400 بات للفرد في النص ساعة وبعد فصال هناك جبت الحجز ليا ولزوجتي نص ساعة ب 750 بات بس.
أما باقي الوقت كنت بتمشي علي الشط أو قاعد علي البحر .
دا تقريباً ملخص لشهر العسل كامل بالتفصيل وفي سنابات كنت مصورها بشرح فيها كل تجربة في وقتها هجمعهم إن شاء الله وأرفعهم على اليوتيوب.
رأيي الشخصي :
ماليزيا بكل ما فيها عجبتني بلد إسلامي وسهل هناك تلاقي أكل حلال علي عكس تايلاند اللي هتدوخ علشان تلاقي فيها أكل حلال، تايلاند أغلي من ماليزيا .. أه زي ما بقولك كدا جرب تشتري اي سلعة فى البلدين وقارن بينهم بعد التحويل لدولار أو جنيه هتلاقي تقريبا تايلاند الضعف فميغركش ان عملتهم بنص جنيه علشان تنزل تتفسح عايز الوفات الباتات ، كمان ماليزيا المواصلات فيها سهلة وجميلة وأسعارها رخيصة جدا وكمان ممكن تستخدم أبلكيشن “جراب” ودا زي اوبر عندنا، نفس الأبلكيشن دا موجود في تايلاند بس نصيحة من أخوك متجربوش علشان هتلاقيه حرّاق، أهل البلد نفسهم في ماليزيا هيعاملوك بحب وصفاء نية مش كأنك سايح ويبيعوا ويشتروا فيك “ماعدا السوق الصيني” لكن تايلاند كلهم كدا .
تعديل :
فندق كوالالامبور : expressionz klcc by G suites
فندق بينانج : station gold budget hotel
فندق لنكاوي : senari bay resort 
فندق بوكيت : 7Q Patong beach hotel 
أتمني أكون فسرت كل حاجة في البوست دا ولو حد عنده أى إستفسار أنا تحت أمره.

عن karimrok

شاهد أيضاً

الفيزا الشنجن وازاي تسافر اوروبا بسهوله مهما كان وضعك

 الفيزا الشنجن وازاي تسافر اوروبا بسهوله مهما كان وضعك  يعني ايه فيزا شنجن ؟؟الفيزا الشنجن …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *